Kia Hum Mohazzab Shehri Hain?

Hum ek mohazzab moashre (society) me rehte hain, is liye hum par kuch iklaqi zimadariyan bhi aaid hoti hain. Is mulk k shehri hone k naate, hamare jo faraiz hain un ko poora karna hum par farz hain. Agar apne charon taraf nazar dorrain to har aadmi koi na koi qanoon torta hua nazar a raha hota hai. Is mulk ko apni jageer samajh kar log jis tarah se qanoon shikni karte hain us se kam uz kam bahar ki duniya k log hamare mohazzab hone par shak zaroor karte hain.

Hamare atraf me aise beshumaar log milen ge jo khud ko acha shehri sabit karni koshish karte hain magar bohat choti si baat par qanoon torna buri bat nai samajhte. Kia hamare yahan line bana kar bill jama karaya jata hai? Kai signal ki light hari (green) hone par hi gaariyan chalti hain? Kia hum bijli chori nai karte? Kia hum apni galiyon ko saaf karne ki koshish karte hain? Kia hamari deewaron par ishtihar (ads) lagana zaroori hai? Kia hum ek dosre se aage nikalne k liye over take nai karte? Kia hum apne ghar ki taqreebat (functions) me halki awaz me gane nai laga sakte? Kia kabhi hum ne ye socha k hamari in harkaton se kisi ki dil azari to nai ho rahi?

Kia ye hamari iklaqi zimmedari nai hai k kisi maazoor ko sarak paar karane me us ki madad karen? Ya agar zebra crossing par kuch bache sarak par karne k intezaar me khare hon to hum apni gari ki raftar kam kar den? Ya kisi buzurg ko bus me apni jagah bethne k liye den de?  Kai hamare under itni ikhlaqi jurrat nai k kisi ghalti par us ki nishan dahi karen? Kia kabhi ache shehri hone k naate sarak par hone wale haadse me hum ne kisi ki madad ki? Ye hamara almiya hai k hum behis ho chuke hain. Hum mohazzab moashre me rehte zaroor hain magar mohazzab hain nai.

Hum se hamari achi baaten magrabi duniya ne apna li hain. Apne mulk me wo log kisi kism ki qanoon shikni nai karte. Sab log apna farz samajh kar apni zimmedarion ko pora karet hain. Kash hamare under bhi ye ehsaas jag jaye k ye mulk hamari jageer nai balke jannat hai. Yahan par rehte hue apne parhe likhe hone ka saboot den. Shayad hamari koshish hamare mulk ko badal de.